“Əl İşindən Brendə Uzanan Yol: Bir Qadının Şirin Hekayəsi”-Nailə Rüstəmova

 

 

Fəxrlə sizə Nailə Rüstəmovanı təqdim edirik — şəxsi sınaqlardan keçmiş və öz yolunu biznes dünyasında taparaq unikal şokolad  brendini yaratmış heyrətamiz bir iş xanımı.Nailə xanım özünü tanıma yolunda uzun və ilhamverici bir inkişaf yolu keçib. Əzmkar və işinə sədaqətli olan Nailə xanım  bütün çətinlikləri geridə qoyaraq uğur yoluna qədəm qoydu.Nailə xanım yüksək keyfiyyətli və unikal şokolad məmulatları istehsal edən şirkətin təsisçisidir. Onun yaratdığı brend dadın, keyfiyyətin və sənətkarlığın ahəngini özündə birləşdirir.Nailə xanım — cəsarətin və arzulara doğru aparan yolun canlı nümunəsidir. Onun şokolad istehsalında göstərdiyi fəaliyyət təkcə dad bilicilərini sevindirmir, həm də başqalarına öz həvəs və maraqlarının ardınca getməyə ilham verir.O, ruhunun səsinə qulaq asaraq necə möcüzə yaratmağın mümkün olduğunu göstərən bir örnəkdir.

-Nailə xanım, siz ətrafınızdakı insanlar tərəfindən güclü və iradəli bir qadın kimi tanınırsınız. Bu güc sizə haradan  gəlir?

-Bəli, insanlar məni güclü və iradəli biri kimi tanıyırsa, bu, heç də təsadüfi deyil. Çünki mən hər bir məqsədimə qətiyyətlə yanaşıram və qarşıma çıxan maneələrə boyun əymirəm. Bu güc, bir çox hallarda məhz yaşadığım çətinliklərdən, keçdiyim təcrübələrdən qaynaqlanır. Hər
uğursuzluq bir dərs, hər çətinlik bir fürsət oldu mənim üçün. Və əlbəttə, ailəmin və yaxınlarımın sevgisi, mənə olan inamı da içimdəki gücü daha da möhkəmləndirən əsas dayaq nöqtələrimdəndir.

-Oxucularımız üçün özünüz barədə daha ətraflı danışardınızmı? Sizi siz edən həyat yolunuz və karyera seçiminiz necə formalaşıb?

-Həyat yolum daim yaradıcılığa və insanlara sevinc bəxş etməyə yönəlib. İki il əvvəl şokoladlara olan marağım məni bu sahəyə gətirdi. Öz əllərimlə fərqli dadlar, gözəl vizuallar yaratmaq arzusu mənə təkcə iş deyil, bir sənət qazandırdı. Çox araşdırdım, öyrəndim, sınaqdan keçirdim və nəhayət bu marağı bir brendə çevirdim – “N&N Sweet”.Bu yol mənim üçün sadəcə bir karyera deyil, daxilimdəki yaradıcı
enerjinin ifadə forması və insanlarla dərin bir bağ yaratma yoludur.

 -Özünüzü həyatın müxtəlif sahələrində sınamısınızmı? Hansı sahələrdə uğur qazandınız, hansı təşəbbüslər isə
uğursuz alındı?

-Bəli, özümü fərqli sahələrdə sınamışam. Hər bir sahə mənə bir həyat dərsi, bir inkişaf fürsəti verdi. Ən böyük uğurum isə əl işi şokolad hazırlamaq sahəsində oldu – çünki bu, mənim içimdən gəlirdi. Bəzi təşəbbüslərim isə planladığım kimi nəticələnmədi. Amma bu uğursuzluqlar mənə “nə istəmirəm” sualına cavab verdi və daha doğru istiqaməti tapmaq üçün bələdçi oldu. Hər dəfə yıxılanda öyrəndim,
öyrəndikcə irəlilədim.

 

 

– Sizcə, bəzi sahələrdə uğursuzluqla qarşılaşmağınızın səbəbi nə idi? Bu təcrübələr sizə nə öyrətdi?

-Uğursuzluqla qarşılaşdığım sahələrdə əsas səbəblərdən biri ya kifayət qədər hazır olmamağım, ya da düzgün planlama aparmamağım idi. Həm də bəzən emosiyalarla hərəkət etdiyim üçün strateji baxımdan səhvlər oldu. Amma bu təcrübələr məni daha rasional, daha məqsədyönlü biri etdi. Artıq hər addımı analiz edir, daha məqsədyönlü və planlı şəkildə hərəkət edirəm. Bu, təkcə iş həyatında deyil, şəxsi
həyatımda da daha balanslı olmağıma kömək etdi.

– Sizi məhz şokolad biznesinə, əl işi məhsullar hazırlamağa yönəldən nə oldu? Bu sahəyə gəlişinizin hekayəsini
paylaşardınızmı?

-Məni bu sahəyə gətirən əsas səbəb, yaradıcı düşüncəmin bir formaya çevrilmək istəyi idi. İnsanlara öz əlimlə hazırladığım dadlı və estetik məhsullar təqdim etmək arzusu içimdə illərlə yaşadı. İlk dəfə evdə özüm üçün şokolad hazırlayanda, bunun yalnız ləzzətli deyil, həm də
mənəvi bir məmnuniyyət verdiyini anladım. Bu hiss o qədər güclü idi ki, məni bu işi peşəyə çevirməyə sövq etdi. Ətrafımdakı insanların müsbət reaksiyası isə mənim üçün mühüm motivasiya oldu və nəticədə “N&N Sweet” doğuldu.

-Öz biznesinizi qurmaq yolunda hansı mərhələlərdən keçdiniz? Qarşınıza hansı çətinliklər çıxdı və onlarla necə
başa çıxdınız , və çıxırsınız?

-Əvvəlcə ideya – nəyi fərqli edə bilərəm sualından başladım. Daha sonra məhsulun hazırlanması, qablaşdırma dizaynı, təqdimat və sosial media üzərindən tanıtım mərhələlərinə keçdim. Ən böyük çətinlik isə resursların məhdudluğu və tanınmamaq idi. Amma hər çətinlik qarşısında dayanmaq əvəzinə, yeni yollar tapmağa çalışdım. Özümə və məhsuluma inandım, kiçik qələbələri böyük hədəflərə aparan pillələrə çevirdim. Bu gün də bu yol davam edir və mən hər addımda öyrənirəm.

– Bildiyimizə görə, bu sahəyə tamamilə sıfırdan başlamısınız. İlk addımlarınız nə olub? Baza, material,ideya – haradan başladınız?

-Bəli, sıfırdan başladım. Heç bir peşəkar avadanlıq, xüsusi bilik yox idi. Sadəcə maraq və qərarlı ruh vardı. İlk addımım evdəki sadə mətbəxdə şokoladlar hazırlamaq oldu. YouTube-dan videolara baxdım, reseptlər axtardım, sınadım, təkmilləşdirdim. Materialları əvvəlcə az miqdarda,lokal mağazalardan aldım. İdeya isə sadə, amma mənalı idi: hər bir insan üçün unudulmaz bir dad və estetik təqdimat
yaratmaq.

– Bir çox qadın potensiala malik olsa da, haradan başlayacağını bilmir. Siz bu yolda olan qadınlara hansı tövsiyələri verərdiniz?

-Ən əsas tövsiyəm: gözləməyin. Heç kim mükəmməl başlanğıcla başlamır. Kiçik bir addım belə, böyük dəyişikliklərin təməli ola bilər. Maraqlarınızı kəşf edin, nədən zövq aldığınızı anlayın və sonra araşdırın, çalışın,praktik edin. Qorxularınıza qulaq asmayın, çünki ən böyük
məğlubiyyət heç başlamamaqdır. Biz qadınlar istədiyimiz hər şeyi bacara bilərik – sadəcə inam və cəsarət lazımdır.

 

 

-Bu biznes üçün xüsusi bir inkişaf strategiyanız olubmu? Hədəflərinizə çatmaq üçün hansı mərhələləri keçmisiniz?

-Əvvəlcə keyfiyyətə fokuslandım – həm dad, həm görünüş baxımından mükəmməl şokoladlar yaratmaq istədim. Daha sonra sosial mediada doğru vizual dili tapdım, müştəri rəylərinə əhəmiyyət verdim. Strategiyam mərhələli idi:

1. Məhsulun formalaşması
2. Müştəri çevrəsinin qurulması
3. Sosial şəbəkə tanıtımı
4. Müştəri rəyinə uyğunlaşma
5. Gələcəkdə daha geniş bazarlara çıxış

Hədəfə çatmaq üçün səbir və planlı hərəkət vacibdir – mən
də bu prinsipə sadiq qaldım.

-Ən çətin anlarda belə sizi ayaqda saxlayan, davam etməyə ilham verən nə oldu?

-Ən çətin anlarda içimdəki səs mənə deyirdi: “Sən buna başladınsa, bacaracaqsan.” İnsanların məhsullarıma verdiyi dəyər, aldığım bir təşəkkür, yazılan xoş bir rəy mənə güc verirdi. Bəzən bir uşaq gülümsəyirdi şokoladımı yeyərkən – və bu, bütün yorğunluğu yox edirdi. Bu işi sevməyim və məqsədimə bağlılığım mənim əsas motivasiyam oldu.

-Biznesinizi genişləndirmək istəyərkən hansı maneələrlə qarşılaşdınız və bu çətinlikləri aşmaq üçün nə etdiniz?

-Biznesi genişləndirmək arzusu içimdə daim var idi, lakin bu yolda qarşıma çıxan əsas maneələrdən biri maddi və texniki imkanların məhdudluğu oldu. Daha çox məhsul hazırlamaq üçün avadanlıqlara, qablaşdırma materiallarına və marketinqə ehtiyac vardı. Digər çətinlik isə daha geniş auditoriyaya çıxmaq üçün lazımi bilik və imkanların ilkin mərhələdə çatışmaması idi. Amma mən bu maneələri dayanma səbəbi yox, inkişaf üçün stimul kimi qəbul etdim. Əlimdə olanla maksimum nəticə almağa çalışdım, müştəri məmnuniyyətini əsas prinsip
seçərək təkrar sifarişləri artırdım. Sosial mediada daha aktiv oldum, təqdimatlarımı təkmilləşdirdim. Ən əsası isə –öyrənməkdən və soruşmaqdan çəkinmədim.

-Uğur yolunuzun ən yaddaqalan məqamlarını bizimlə bölüşərdinizmi? Sizin uğur hekayəniz necə başladı və bu günə necə çatdı?

-Uğur yolumda ən unudulmaz məqam ilk sifarişi aldığım gündür. O gün qəlbimdə bir şey dəyişdi – artıq sadəcə özüm üçün şokolad hazırlayan biri deyil, kiminsə gününə ləzzət və sevinc qatan bir insan idim.Bundan sonra ilk müştəri rəyi, sosial mediada ilk paylaşım,
ilk təşəkkür mesajı — hamısı yadımdadır. Hər biri sanki bir pillə idi və mən hər pillədə daha çox inandım, daha çox sevdim bu yolu. Mənim üçün uğur, milyonlarla qazanc deyil, minlərlə minnətdar təbəssümdür.

 

 

-“Fortuna” — uğur deməkdir. Uğur sizə ilk dəfə nə zaman üz tutdu və bu, həyatınıza necə təsir etdi?

-Fortuna mənim qapımı ilk dəfə özümü riskə atdığım və şokoladlarımı sosial mediada paylaşdığım zaman döydü. Əvvəl tərəddüd edirdim, bəyənilərmi, sifariş gələrmi, bu iş alınarmı? Və sonra – ilk tanımadığım müştəridən sifariş gəldi. Bu kiçik uğur mənim üçün bir güzgü oldu – özümü orada gördüm, potensialımı hiss etdim. Bu uğur mənə yol göstərdi, daha inamlı addımlar atmağa təşviq etdi. Həyatımda o andan etibarən təkcə istiqamət yox, eyni zamanda motivasiya da dəyişdi.

-Həyatınızın dönüm nöqtəsi hansı an olub? O hadisə sizi  necə dəyişdi?

-Həyatımın dönüş nöqtəsi, qorxularımı bir kənara qoyub ilk dəfə yaratdıqlarımı paylaşdığım andır. O anda düşündüm: “Bəlkə bəyənilməz?” Amma əksinə, aldığım sevgi və dəstək, mənim inamımı qat-qat artırdı.Bu hadisə mənə göstərdi ki, risk etmədən heç bir uğur əldə
olunmur. O gündən sonra daha sərbəst, daha yaradıcı və daha inamlı biri oldum. Düşüncə tərzim dəyişdi – qorxmaq
yerinə cəhd etməyi, tənqid yerinə öyrənməyi seçdim.

-Sonda, bu günkü təcrübəniz və baxışınızla özünüzə hansı arzunu edərdiniz?

-Bu günkü təcrübəm və daha yetkin baxış bucağımla özümə bircə şey arzulayıram: ilk günkü həvəsi heç vaxt itirməyim. Çünki işini sevərək görmək, uğurun ən sarsılmaz təməlidir.Arzu edirəm ki, “N&N Sweet” daha geniş kütlələrə çatsın, daha çox insanın xatirəsinə dadlı bir iz buraxsın. Hər zaman çalışqan, səbirli, dürüst və yaradıcı qalım. Kim olduğumu və hardan başladığımı heç vaxt unutmayım — çünki bu
köklər mənim gücümün qaynağıdır.

 

 

 

Müsahibəni apardı:  “Fortuna”  jurnalının təsisçisi və baş redaktoru Səidə Musayeva